“شو كنت حابب إفرح فيك يا بيي”… الاب مجدي علاوي يستذكر ابنه بكلمات مؤثرة: “اشتقتلك”

استذكر الاب مجدي علاوي إبنه ماتيو بكلمات مؤثرة جدا، وكتب عبر صفحة “سعادة السماء” ما يلي:

“غابت الضحكة ودبل الورد واتغير مكان وزمان العرس، السما اتزيّنت ولبست أنقى ثوب تا تستقبل العريس.

شو كنت حابب إفرح فيك ،انسرق الحلم يا بيي وصارت حياتك واقع مجسّد بصور معلقة على الحيطان بعد ما كانت الدني مش سايعتك…
غدروك وبحقدن زنّروك وجسدك الضعيف انهزم، انطعن ،مات واندفن….
٤٠ يوم بعدّت عنا بالجسد بس روحك باقية وخالدة مع كل نسمة عم تهمس ما تخافوا وما تبكوا عليي انا عايش بسلام وامان وإنتو دايماً بصلاتي ….
شوفوني مع غمرة كل فقير مع بلسمة جرح كل مشرّد مع كل صنّارة عم بتأمن الصيد لعيش حياة كريمة ،انا باقي معكن بثورة الحب ما تخافوا تثوروا وتطالبوا بعدالة الحب.
ربي يسوع وإمي مريم ماتيو وديعة بين إيديكن، احضنوا ودفوا بحبكن وحنانكن ومعكن عرس السما بيحلى ….

الله يهنيك يا ابني بمجد السماء اشتقتلك …
خادم جمعية سعادة السماء الأب مجدي العلاوي”.